काठमाडौं, २१ कात्तिक २०८१ वुधवार । गण्डकी प्रदेशसभा सदस्य दीपक मनाङेलाई सर्वोच्च अदालतले पनि ज्यान मार्ने उद्योगमा दोषी ठहर गरेको छ । मंगलबार न्यायाधीश डा. नहकुल सुवेदी र टेकप्रसाद ढुंगानाको
इजलासले यसअघि तत्कालीन पुनरावेदन अदालत (हालको उच्च अदालत) पाटनले गरेको फैसलालाई सदर गरेको हो । तत्कालीन पुनरावेदन अदालत पाटनले मनाङेलाई २०६९
सालमा ५ वर्ष कैद सजाय सुनाएको थियो । दीपक मनाङेको समूहले २०६१ सालमा (अर्का डन) चक्रे मिलन भनिने मिलन गुरुङलाई तरबार हानेको थियो । उक्त घटनालाई लिएर
जिल्ला सरकारी वकिल कार्यालय काठमाडौंले मनाङेको समूहविरुद्ध कर्तव्य ज्यान मुद्दा दर्ता गरेको थियो । तर, जिल्ला अदालत काठमाडौंले कर्तव्य ज्यान नभई कुटपिट
भएको ठहर गर्दै मनाङेलाई २ वर्ष जेल सजाय सुनाएको थियो ।उक्त फैसलाविरुद्ध सरकारी वकिलको कार्यालय पुनरावेदन अदालत पाटन गएको थियो । अदालतले २०६९
मा ज्यान मार्ने उद्योग (प्रयास) गरेको ठहर गर्दै मनाङेलाई ५ वर्ष जेल सजाय सुनाएको थियो भने सो समुहका अरुलाई सफाइ दिएको थियो । तत्कालीन पुनरावेदन अदालत पाटनले
५ वर्ष कैद सजाय सुनाएपछि मनाङे पक्राउ परेका थिए । तर १० वर्ष भन्दा कम जेल सजाय भएको मुद्दामा जेलबाहिर रहेर पुर्पक्ष गर्न पाइने कानुनी व्यवस्था अनुसार उनी रिहा
भएका थिए । सर्वोच्चमा मुद्दा विचाराधीन रहेकै अवस्थामा मनाङले मनाङबाट दुई कार्यकाल गण्डकी प्रदेशसभा सदस्य चुनिएर पटक–पटक मन्त्री पनि बनिसकेका छन् ।।